Prezidentning 2020-yil 30-oktyabrdagi “Sog‘lom turmush tarzini keng tatbiq etish va ommaviy sportni yana-da rivojlantirish chora-tadbirlari to‘g‘risida”gi farmoni 4-bandi o‘z kuchini yo‘qotdi.

Bu haqdagi Prezident farmoni joriy yil 7-aprel kuni imzolangan.

Unga ko‘ra, shu kunga qadar aholini kunlik yurish va yugurishga targ‘ib qilish maqsadida ishlab chiqilgan “Sog‘lom turmush tarzi” (www.1hls.uz) platformasi ish faoliyati to‘xtatilgan.

Maʼlumot uchun, mazkur platformada bir sutkada o‘n ming va undan ortiq qadam yurgan O‘zbekiston fuqarosining platformadagi elektron hamyoniga 3 ming so‘mdan, har oyda har bir tuman (shahar) bo‘yicha eng ko‘p yurgan shaxsga 300 ming so‘mdan, har bir hudud bo‘yicha eng ko‘p yurgan shaxsga 500 ming so‘m, respublika bo‘yicha eng ko‘p yurgan shaxsga 1 million so‘m qo‘shimcha ravishda platformadagi elektron hamyoniga o‘tkazilishi belgilangan edi.

Keyinroq, 2021-yil 9-noyabrdagi videoselektorda Shavkat Mirziyoyev “Sog‘lom turmush tarzi” platformasida foydalanuvchilar soni 600 ming nafarga yetgani, Moliya vazirligiga kelgusi yilda bu boradagi targ‘ibot ishlarini kuchaytarish va platformadan foydalanuvchilar ko‘lamini yana-da kengaytirishga qo‘shimcha 60 milliard so‘m ajratishga ko‘rsatma berilgani maʼlum qilindi.

Biroq, 2022-yil 15-yanvariga kelib, PF-6099-sonli Prezident farmoniga o‘zgarish kiritilib, har kuni 10 ming qadam piyoda yurganlarga 3 ming so‘m berish tizimi to‘xtatildi va yangi tizim – har hafta 100 mln so‘m va mingta velosiped berish tizimi ishga tushirilgani eʼlon qilindi.

Ammo, bundan 3 oy o‘tib, bu tizim ham to‘xtatildi va yuqoridagi hujjat bilan ushbu tizim butunlay bekor qilindi.

• Farmon
• Mirziyoyev
• salomatlik