Buxoro shahridagi “Talipoch qal’a darvozasi” chap tomonidagi qal’a devorining bir qismi o‘pirilib tushdi. Bu haqda Madaniy meros agentligi xabar berdi.

Ma’lum qilinishicha, 2022-yilning 11-mart kuni kechki payt hafta davomidagi muttasil yog‘ingarchilik oqibatida Buxoro shahridagi “Talipoch qal’a darvozasi” chap tomonidagi qal’a devorining bir qismi qulab tushgan. 12-mart kuni Buxoro viloyat hokimyati, Madaniy meros boshqarmasi, Favqulodda vaziyatlar boshqarmasi, Buxoro mintaqaviy restavratsiya markazi, Buxoro viloyat madaniy meros boshqarmasi mas’ul xodimlari va boshqarmaning maxsus eskspertlaridan iborat Jamoatchilik Ilmiy maslahat kengashi a’zolari hodisa joyini o‘rgangan.

O‘rganish natijasida, o‘tgan yillar davomida XVI asrga tegishli 2003-yilda qayta tiklangan “Talipoch qal’a darvozasi” atrofidagi devorning chap qanoti ortidagi madaniy qatlamlarning cho‘kkani, qoplama devorlarida yoriqlar paydo bo‘lgani hamda mart oyida kuzatilgan doimiy yog‘ingarchilik devorning cho‘kishi va qulab tushishiga olib kelgani aniqlangan.

“Ta’kadlash lozim, ‘Talipoch qal’a darvozasi’ 2022-yil davomida asrashga doir ishlar amalga oshiriladigan moddiy madaniy meros ko‘chmas mulk obyektlarining manzilli ro‘yxatiga kiritilgan.
Hozirda soha mutasaddilari va mutaxassislar tomonidan mazkur obyektning atrofini o‘rab olish, mazkur huddudda yashovchi fuqarolar va obyektga tashrif buyuruvchi sayyohlar xavfsizligini ta’minlash choralari ko‘rildi. Shuningdek, Buxoro viloyati Madaniy meros boshqarmasi va ekspertlar tomonidan obyektning texnik holati o‘rganilib va uni tezkorlik bilan qayta tiklash choralarini ko‘rish bo‘yicha muhokamalar olib borilmoqda”, deyiladi xabarda.

Qayd etilishicha, madaniy meros obyektida 2003-yilda restavratsiya ishlari amalga oshirilgan bo‘lsada, unda shoshma-shosharlikka yo‘l qo‘yilgani, ta’mirlash ishlari malakali ustalar tomonidan olib borilmagani o‘z ta’sirini ko‘rsatgan. Endilikda bu kabi kamchiliklarni oldini olish maqsadida Turizm va madaniy meros vazirligi huzuridagi Madaniy meros agentligi tomonidan madaniy meros obyektlarini restavratsiya ishlarini puxta o‘ylangan reja asosida, malakali mutaxassislar ishtirokida amalga oshirish choralari ko‘rilmoqda.

• Buxoro
• Sel
• qal'a