Buyuk Britaniya 10-yanvardan boshlab O‘zbeksistonda berilgan koronavirusga qarshi emlanganlik to‘g‘risidagi sertifikatlarni rasman tan oladi. 

Xabarga ko‘ra, Buyuk Britaniyaga safar qilayotgan O‘zbekiston fuqarolari xorijga chiqishdan kamida 14 kun oldin to‘liq vaksinatsiya kursini o‘tagan bo‘lsalar, emlanganlik to‘g‘risidagi sertifikat haqiqiy hisoblanadi.

Shuningdek, Buyuk Britaniyaga kirish uchun quyidagi vaksinalardan biri bilan emlanganlik bo‘lish shart ekanligi qayd etilgan:

- Covaxin;
- Moderna;
- Janssen (bitta doza);
- Novavax (Nuvaxovid va Covovax);
- Oxford/AstraZeneca;
- Pfizer/BioNTech;
- Sinopharm Beijing;
- Sinovac-CoronaVac.

Biroq, O‘zbekistonda eng ko‘p qo‘llanilayotgan ZF-UZ-VAC 2001 xitoy-o‘zbek vaksinasi ular orasida mavjud emas.

“Vaksinatsiya sertifikatiga ega bo‘lgan O‘zbekiston fuqarolari endilikda Buyuk Britaniya hududiga kirish uchun PZR testini taqdim etishlari kerak bo‘lmaydi va ular 10 kunlik karantin o‘tish talabidan ozod qilinadi. Bundan tashqari, Britaniya hududiga kirgandan so‘ng PZR test o‘rniga ancha arzonroq turuvchi IFA-test (lateral flow test) topshiriladi”, – deyiladi xabarda.
  

• Buyuk Britaniya
• Vaksina