Hindiston dahshatli jazirama to‘lqinini boshdan kechirmoqda. Bir qancha shaharlarda havo harorati Selsiy bo‘yicha 45 darajadan oshib ketgan va o‘nlab odamlar jaziramadan nobud bo‘lmoqda. 29-may kuni 52,9 daraja issiq harorat qayd etildi. Shahardagi qushlar va yovvoyi maymunlar issiqdan hushidan ketmoqda. Bu haqda “BBC” xabar berdi.

Qayd etilishicha, ekstremal ob-havo mamlakat bo‘ylab allaqachon kamida 50 kishi hayotiga zomin bo‘ldi. Hindiston butun mamlakat bo‘ylab issiqlikdan halok bo‘lganlarning umumiy sonini e’lon qilmaydi. Ayni paytda mamlakatda umumxalq saylovlari o‘tkazilmoqda. Ularni tashkillashtirishda qatnashayotganlar ham issiqdan vafot etmoqda.

Saylov olti hafta davom etadi, u yetti bosqichda bo‘lib o‘tadi va ko‘plab saylovchilardan kun bo‘yi, ko‘pincha ochiq havoda navbatchilik qilishni talab qiladi.

Payshanba kuni Bixar shtatida jazirama tufayli 14 kishi halok bo‘ldi, deya xabar beradi rasmiy manbalar.  Ulardan 10 nafari saylovlarni tashkillashtirishda ishtirok etgan.

Hindistonning eng zich joylashgan shtati Uttar-Pradeshda juma kuni kamida to‘qqiz nafar saylov komissiyasi xodimi, jumladan qo‘riqchilar halok bo‘ldi, deb xabar bermoqda “Reuters”.

“Ularni olib kelishganda haroratlari yuqori bo‘lgan. Bunga issiqlik urishi ham sabab bo‘lishi mumkin. Biz hozirda saylovdan olib kelingan kamida 23 kishini davolayapmiz”, dedi jabrlanganlar olib kelingan tibbiyot muassasasi direktori jurnalistlarga.

• Hindiston
• Jazirama