Joriy yilning 9-sentabridan kuchga kiradigan “Reklama to‘g‘risida”gi yangi qonunning 34-moddasida dori vositalari reklamasi bo‘yicha tartiblar belgilandi.

Qonunga ko‘ra, quyidagilar taqiqlanadi:

– faqat shifokorning retsepti bo‘yicha tarqatiladigan dori vositalari;

– tarkibida giyohvandlik vositalari yoki psixotrop va (yoki) kuchli taʼsir qiluvchi moddalar mavjud bo‘lgan dori vositalari;

– O‘zbekiston tibbiyotida qo‘llanish uchun ruxsat etilmagan dori vositalari;

– Sog‘liqni saqlash vazirligida davlat ro‘yxatdan o‘tkazilmagan dori vositalari reklamasi mumkin emas.

Dori vositalarini reklama qilishda taniqli shaxslar, tibbiyot xodimlari yoki tashqi ko‘rinishi shifokorlarning tashqi ko‘rinishiga o‘xshash shaxslarning ishtirok etishi mumkin emas.

Mazkur talab foydalanuvchilari faqat tibbiyot va farmatsevtika xodimlari bo‘lgan reklamaga, tibbiyot yoki farmatsevtika ko‘rgazmalari, seminarlari, konferensiyalari va boshqa shunga o‘xshash tadbirlar o‘tkaziladigan joylarda tarqatiladigan reklamaga, shuningdek, bosma nashrlarga joylashtirilgan reklamaga nisbatan tatbiq etilmaydi.

Reklamalarda olimlarning, tibbiyot xodimlarining tavsiyalaridan, shuningdek alohida shaxslarning minnatdorligidan va reklama qilinayotgan dori vositalarining taʼsiri haqidagi hikoyalaridan iborat bo‘lgan tavsiyalardan foydalanish ham taqiqlanadi.

• Dori
• SSV
• reklama