Charlz Stert universiteti olimlari saraton bo‘yicha tadqiqot o‘tkazishdi va uning natijalari JAMA Network Open jurnalida chop qilindi.

Olimlar saraton bilan kasallanganlar soni 76,6 foizga – 2022-yildagi 20 milliondan 2050-yilda 35,3 milliongacha oshishini taxmin qilishmoqda.

Olimlar sog‘liqni saqlash, ta’lim va aholi daromadlarining o‘rtacha darajasini aks ettiruvchi Inson taraqqiyoti indeksining turli darajalariga ega bo‘lgan mamlakatlar o‘rtasida saraton kasalligi dinamikasida sezilarli farqlarni aniqlashdi. Shunday qilib, inson taraqqiyoti indeksi past bo‘lgan mamlakatlarda saraton kasalligining yangi holatlari deyarli uch baravar ko‘payib, 142,1 foizga, o‘lim esa 146,1 foizga oshishi mumkin. Inson taraqqiyoti indeksi juda yuqori bo‘lgan mamlakatlarda kasallanish va o‘lim darajasining nisbatan kamroq o‘sishi kutilmoqda - mos ravishda 41,7 foiz va 56,8 foiz.

Tadqiqot shuningdek, jinslar bo‘yicha farqlarni aniqladi: 2050-yilga kelib erkaklarda saraton kasalligi sonining o‘sishi 84,3 foizni, o‘lim esa 93,2 foizni tashkil qilishi kutilmoqda, bu ayollarnikiga qaraganda yuqori. Ushbu nomutanosiblikka ta’sir etuvchi omillar qatoriga erkaklar orasida xavf omillarining (masalan, alkogol va tamakiga qaramlik) yuqori darajada tarqalishi, shuningdek, ayrim hududlarda skrining va davolash xizmatlarining sifatsizligi kiradi.

• Olimlar
• Saraton
• ilm-fan
• salomatlik
• tadqiqot