Rossiya prezidenti Vladimir Putin kecha, 27-oktyabr kungi nutqida AQSH va uning ittifoqchilari hamda “Gʻarb elitasini” “xavfli o‘yin” o‘ynayotganlikda, ularni dunyoda yuz berayotgan voqealarga javobgarlikda aybladi.

Moskvadagi “Valday klubi” munozaralar forumida so‘zga chiqqan Putin Rossiya Ukrainaga qarshi yadro qurolidan foydalanishga urinayotgani haqidagi xabarlarni inkor etib, mamlakat bu haqda hech qachon o‘ylamaganini ta’kidladi, biroq yadroviy qurol mavjud ekan, doimo undan foydalanish xavfi borligini qo‘shimcha qildi.

“Hech qachon Rossiya yadro qurolidan foydalanish ehtimoli haqida hech narsa aytmaganmiz. Biz faqat Gʻarb yetakchilarining (yadroviy tahdidlariga) ishoralar bilan javob berdik”, – dedi Putin.

U, shuningdek, g‘arb hukumatlari, jumladan Buyuk Britaniya sobiq bosh vaziri Liz Trassni Rossiyaga qarshi “yadroviy shantaj”da ayblagan.

Putin, shuningdek, Gʻarbni Moskvaga qarshi neytral davlatlarga ta’sir o‘tkazish uchun “Rossiya yadro qurolidan foydalanadi degan tezisni yuborish”da aybladi. Uning ta’kidlashicha, Rossiyaning harbiy doktrinasi yadro qurolidan faqat “mudofaa” maqsadida foydalanishga ruxsat beradi.

AQSH Davlat kotibi Entoni Blinken esa buni “yana bir uydirma va yadroviy quroldan kelib chiqadigan mas’uliyasizlikning cho‘qqisi” deb ta’rifladi.

Blinken, AQSH Kremlning yadro qurolini “juda ehtiyotkorlik bilan” kuzatayotgani, ammo “yadroviy holatini o‘zgartirish uchun hech qanday sabab ko‘rmaganini” yana bir bor ta’kidladi.

Rossiya prezidenti, shuningdek, Moskvaning noqonuniy bosqiniga qarshi Kiyevni qo‘llab-quvvatlagan Gʻarb hukumatlarini ham global hukmronlikka intilishda va dunyo tabiiy resurslarini nazorat qilishga urinishda aybladi.

“Dunyo ustidan hokimiyat bu Gʻarb, deb ataladigan jamiyatning o‘yiniga asoslanadi. Ammo bu xavfli o‘yin. Bu qonli o‘yin. Bu mamlakatlarning barcha suverenitetlarini inkor etadi va ularning o‘ziga xosligi, boshqa davlatlarning manfaatlarini hisobga olmaydi”, – dedi Putin.

Shuningdek, Rossiya rahbari Gʻarbni boshqa mamlakatlarda “rangli inqiloblar uyushtirishda” aybladi.

Uning so‘zlariga ko‘ra, dunyo Ikkinchi jahon urushi tugaganidan beri “eng xavfli o‘n yillik”ga duch keldi, shu bilan birga Ukrainadagi mojaroning oldini olish mumkin emasligi haqidagi da’vosini Gʻarb va NATO kengayayotgani bilan izohladi:

“NATOning Ukraina bilan kengayishi biz uchun mutlaqo nomaqbul edi va bu hammaga ayon bo‘lgan. Hech kim bknga e’tibor bermadi. Ular xavfsizlik sohasiga qiziqishni umuman e’tiborsiz qoldirdilar va ma’lum bir urinish muvaffaqiyatsiz tugadi”.

Putin ruslar va ukrainlar tarixan bir xalq bo‘lganini ta’kidladi va hozir sodir bo‘layotgan voqealar fuqarolar urushiga o‘xshash hodisa ekanini alohida ta’kidladi.

Shuningdek, urush Rossiyaga qimmatga tushayotgan bo‘lsa-da, oxir-oqibat mamlakat uchun yaxshi bo‘lishi kutilayotganini aytib o‘tdi.

“Albatta, bizda ba’zi muammolar bor. Bu, birinchi navbatda, maxsus harbiy amaliyot tufayli yuzaga kelgan yo‘qotishlarimiz bilan bog‘liq. Men bu haqda doim gapiraman. Ammo bizda iqtisodiy yo‘qotishlar bilan birga ulkan yutuqlar ham bor. Hozir sodir bo‘layotgan voqealar, shubhasiz, Rossiya va uning kelajagi, manfaati uchun. Bu bizning iqtisodiy sohada suverenitetimizni har tomonlama mustahkamlash bilan bog‘liqlir”, – dedi Vladimir Putin.

• G'arb
• Matbuot
• NATO
• Putin
• Ukraina