Ukrainaning Madaniyat va axborot siyosati vazirligi “Eurovision-2023” tanlovi mamlakat hududida oʻtkazilishini maʼlum qildi. U tanlovning Ukrainadan boshqa biror mamlakatda oʻtkazilishi haqidagi gap-soʻzlarni rad etgan.

Bu yilgi tanlovda Ukrainaning “Kalush Orchestra” guruhi gʻolib boʻlgani haqida xabar bergan edik. Qoidaga koʻra, unda gʻolib boʻlgan mamlakat kelgusi yili tanlovga mezbonlik qilishi kerak. Ukrainadagi vaziyatdan kelib chiqqan muxlislar tanlovning mamlakatda oʻtkazilmasligini taxmin qilishgan.

“Tanlov Ukrainada boʻlib oʻtadi. Uni aynan qayerda oʻtkazish mumkinligini allaqachon oʻylay boshladik. Bu ilk gʻalabalarimizdan biri, eng katta gʻalaba – oldinda!”, dedi Aleksandr Tkachenko.

Madaniyat vaziri bu masalani tez kunlarda muhokama qilishlarini aytib oʻtgan.

Eslatib oʻtamiz, ukrainalik ijodkorlarni tanlovdagi gʻalabadan keyin mamlakat prezidenti Vladimir Zelenskiy ham tabriklab, kelgusi yili mehmonlarni “ozod Mariuopol”da kutib olish uchun qoʻlidan kelgan ishni qilishi haqida aytgandi.

• Madaniyat
• San’at
• tanlov