Buyuk Britaniya bosh vaziri Boris Jonson “Eurovision-2023” xalqaro tanlovi Ukrainada oʻtkazilishi kerak degan fikrda. Siyosatchi bu haqida Kiyevdan ortga qaytish vaqtida aytib oʻtdi.

Tashkilotchilar tanlovga mezbonlik qilish huquqini Buyuk Britaniyaga berish qaroriga kelgan edilar. Bunga Rossiyaning Ukrainadagi harbiy harakatlari sabab boʻlgan.

“Ukrainaliklar ”Eurovision“ tanlovida gʻolib boʻlishdi. Ajoyib chiqish boʻlganini bilaman, biz esa ikkinchi oʻrinni oldik, men tanlovning mamlakatimizda oʻtkazilishini istagan boʻlardim. Ammo, haqiqat shunday: ular (Ukraina) gʻolib boʻldi va tanlovni oʻtkazishga toʻliq haqlilar”, dedi Jonson.

Bosh vazirning fikricha, tanlov “Kiyev yoki Ukrainaning boshqa biror xavfsiz shahrida oʻtkazilishi lozim”.

“Oldinda bir yil vaqt bor. Tanlov boshlangunicha hammasi yaxshi boʻladi va umid qilamanki, ukrainaliklar tanlovni oʻzlari oʻtkazishadi”, dedi Jonson.

• Madaniyat
• tanlov