“Eurovision” tashkilotlari xalqaro tanlov 2023-yilda Ukrainada oʻtkazilmasligini maʼlum qildilar. Ularning fikriga koʻra, Rossiyaning Ukraina hududidagi maxsus harbiy operatsiyasi bunga toʻsqinlik qiladi.

Tashkilotchilar tanlovni kelgusi yili Buyuk Britaniyada oʻtkazish uchun mamlakat hukumati bilan muzokaralarni boshlashgan. Bu yilgi tanlovda Buyuk Britaniya vakili Sem Rayder ikkinchi oʻringa munosib deb topilgan edi.

Eslatib oʻtamiz, “Eurovision-2022” xalqaro tanlovida Ukrainaning ”Kalush Orchestra“ guruhi “Stefaniya” qoʻshigʻi bilan gʻoliblikni qoʻlga kiritgan. Guruh vakillariga topshirilgan mukofot – billur mikrofon ijodkorlar tomonidan kimoshdi savdosiga qoʻyilgan va 900 ming AQSh dollariga sotilgan. ”Kalush Orchestra” yakkaxoni Oleg Psyuk savdodan tushgan pul Ukraina qurolli kuchlariga taqdim etilishini aytib oʻtgan.

Qoidaga koʻra, gʻoliblikni qoʻlga kiritgan mamlakat kelgusi yili tanlovga mezbonlik qilish kerak. Bu yilgi tanlovda Ukraina vakillari gʻolib boʻlganidan soʻng mamlakat prezidenti Volodimir Zelenskiy kelgusi yili mehmonlarini “ozod Mariuopolda” kutib olishga vaʼda bergandi.

• Buyuk Britaniya
• Madaniyat
• San’at
• Shou-biznes
• Ukraina
• tanlov