“Manchester Siti” Angliya Premyer-ligasining 27-turida “Tottenhem”ga qarshi o‘ynadi. Uchrashuvda Gvardiola shogirdlari 1:0 hisobida g‘alaba qozondi. Bahsda jamoaning o‘zbekistonlik himoyachisi Abduqodir Husanov to‘liq harakat qildi. Uchrashuvdan keyingi matbuot anjumanida “shaharliklar” ustozi Pep Gvardiola u haqida iliq fikrlar bildirib o‘tdi:

“Husanov allaqachon kiyinish xonasida yoqimtoyga aylangan. U Londonga hech qanday ortiqcha buyumlarsiz, hatto tish cho‘tkasi olmasdan shunchaki futbol o‘ynash uchun keldi.

U bilan gaplashsangiz, faqat kulib turadi. Biroq u juda ishonchli futbolchi.

U juda tez, judayam, judayam tezkor. To‘p bilan muomala va uzatmalarining sifati g‘ayrioddiy darajada. U hali endi 20 yoshda. Vaqt o‘tgan sari yaxshilanib boraveradi.

Undagi tezlikni shu paytgacha ko‘rmaganman. Tezkor futbolchilarni ko‘p ko‘rganman, lekin u eng yaxshilaridan biri.

Uni hamma yaxshi ko‘radi. U kamgap, mehnatkash, umuman nolimaydi. U jamoa muxlislariga yoqib qolishi aniq. “Chelsi”ga qarshi o‘yinning dastlabki 5 daqiqasida bo‘lgan voqeadan so‘ng o‘zini o‘nglash oson emas edi, ammo u o‘zini yo‘qotmadi hamda vaziyatni yaxshiladi. So‘nggi o‘yinlarda juda yaxshi natija ko‘rsatmoqda”, – degan ispaniyalik mutaxassis.

• Abduqodir Husanov
• Fikr
• Gvardiola
• Manchester Siti