Portugaliya futbol federatsiyasi Krishtianu Ronalduni bir oy muddatga milliy terma jamoa safidagi o‘yinlardan chetlatdi va unga 255 yevro miqdorida jarima belgiladi. Bu haqda federatsiya bayonotiga tayanib, jurnalist Fabritsio Romano ma’lum qildi.

Ma’lumotlarga ko‘ra, Ronaldu joriy yilning 30-sentabr kuni mashg‘ulotlar yig‘ini vaqtida terma jamoa ixtiyorini tark etgan. Bunga bosh murabbiy Xorxe Jezusning unga bergan va’dalarini ikki marta buzishi sabab bo‘lgani aytilmoqda.

Hujumchi avvalroq Millatlar ligasi doirasida Uelsga qarshi 1:0 hisobidagi g‘alabali uchrashuvda maydonga tushgan, Norvegiyaga qarshi 2:1 hisobida yakunlangan bahsda esa zaxirada qolgan. Ronalduning aytishicha, dastlab uning Norvegiyaga qarshi o‘yinda ishtirok etishi rejalashtirilmagan, biroq murabbiy undan 30 daqiqa o‘ynashga tayyor turishni so‘ragan. Shunga qaramay, futbolchi maydonga tushirilmagan.

Keyinchalik Ronaldu terma jamoani tark etish niyati yo‘qligini va chaqiruv olsa, o‘ynashga tayyor ekanini bildirgani ma’lum qilingan.

Portugaliya terma jamoasi Millatlar ligasidagi dastlabki to‘rtta uchrashuvning barchasida g‘alaba qozonib, chorak finalga yo‘l olgan. Guruh bosqichining so‘nggi bahslarida jamoa Daniya va Uels bilan uchrashishi belgilangan.

41 yoshli Krishtianu Ronaldu Yevropa chempioni va Millatlar ligasining ikki karra g‘olibi hisoblanadi. U faoliyati davomida “Sporting”, “Manchester Yunayted”, “Real Madrid” va “Yuventus” klublarida to‘p surgan. 2022-yil dekabridan buyon Saudiya Arabistonining “Al-Nasr” jamoasida o‘ynamoqda.