Ijtimoiy intellekt - bu insonga boshqalar bilan muvaffaqiyatli munosabatda bo‘lishga yordam beradigan bilim, ko‘nikma va qobiliyatdir. O‘zimiz va boshqalarning xatti-harakatlarini tushunish, vaziyatga qarab harakat qilish qobiliyati shular jumlasidandir.

Rossiya Fanlar akademiyasining muxbir a'zosi, psixologiya fanlari doktori Dmitriy Ushakovning yozishicha, zamonaviy dunyoda mehnat taqsimoti kuchayib bormoqda va shuning uchun individual yutuqlar tobora jamoaviylikka aylanib bormoqda. Muvaffaqiyatga erishish uchun esa, bugungi kunda o‘z sohangizning professionali bo‘lishning o‘zi yetarli emas. Shuningdek, siz odamlar bilan munosabatlarni yaxshilash, o‘zingiz g‘oyalar yaratish, ularni jamiyatda targ‘ib qila olishingiz kerak. Misol uchun, takliflarni ilgari surishdan qo‘rqmang va murakkab narsalarni oddiy so‘zlar bilan tushuntirishni o‘rganing.

Ijtimoiy intellektda intuitsiya va shaxsiy sifatlar asosiy rolni o‘ynaydi. Aslida, ijtimoiy intellekt insonning odamlarni va kundalik vaziyatlarni qanchalik tushunishining ko'rsatkichi hisoblanadi. Odatiy hayotda bunday ko‘nikmalarni xushmuomalalik va sog‘lom fikrlash deb atashadi. Shuni ham aytib o‘tish kerakki, ijtimoiy intellekt yuqori aqliy daraja bilan o‘lchanmaydi. Bunga misol qilib esa, Sherlok Holmesni yoki "The big bang theory" serialidagi bosh qahramon Sheldonni misol qilib keltirishimiz mumkin. Ayniqsa, Sheldon aqliy darajasi eng yuqori insonlardan biri deb hisoblangan bo‘lsa-da, uning ijtimoiy intellekti past deyiladi. Shu sababdan ham u atrofdagilarning tuyg‘ularini to‘g‘ri baholay olmaydi va buning ortidan do‘stlari hamda hamkasblari bilan til topishga qiynaladi.

Ijtimoiy intellektni rivojlantirishdan foyda nima?

Ijtimoiy intellekt insonning o‘zini, xulq-atvorini, boshqa odamlarning xatti-harakatlarini tushunish va samarali o‘zaro munosabatlarni o‘rnatish, maqsadlarga erishish qobiliyatini rivojlantirishni o‘z ichiga oladi. Ushbu qobiliyatni o‘zingizda rivojlantirish orqali siz insonlarni yaxshi tushunish bilan birga, ular bilan yaxshi aloqalar o‘rnatishingiz, jamiyatda o‘z o‘rningizni topgan holda, maqsadlaringizga muvaffaqiyatli erishishingiz mumkin.

Ijtimoiy intellektni qanday rivojlantirish mumkin?

1. O‘zingizda ijtimoiy sezgirlikni oshiring. Ego ramkalaringizdan chiqing va odamlarning xulq-atvorini kuzatish va o‘rganishni boshlang;
2. Tana tilini o‘rganing;
3. Muloqotning kuchli vositasi bo‘lgan yuz ifodalari va mimikalarni kuzatib, o‘rganishni o‘zingizda rivojlantiring;
4. Insonlar kayfiyatini tushunishni o‘rganing. O‘zingizda aktyorlik qobiliyatini rivojlantiring. Chunki bularning har ikkisi ham ijtimoiy intellektni rivojlantirishda katta rol o‘ynaydi. Ushbu qobiliyatning asosoiy ko‘nikmalaridan biri ham kayfiyatni tushuna olish va vaziyatga moslashishdir;
5. Notiqlik qobiliyatingizni oshiring;
6. "Mafiya", "Monopoliya" kabi "ijtimoiy" o‘yinlarni o‘ynang.

Agar siz bu tavsiyalar siz uchun emas va sizning ijtimoiy intellektingiz shundoq ham joyida ekanligiga takabburlik bilan ishonsangiz, adashasiz.

Ijtimoiy intellektning rivojlanishi cheksiz jarayondir. Chunki bizning hayotdagi vazifalarimiz va maqsadlarimiz doirasini o‘sib bormoqda. Olti oy o‘tgach, siz ish joyida ko'tarilishingiz, endi o‘rganib qolgan hamkasblaringizdan uzoqlashib boshqa filiallarga o‘tishingiz, ish joyingizni o‘zgartirishingiz mumkin va bunda atrof muhitingiz tamomila o‘zgarib ketadi. Joylashayotgan joyingizda aloqalarni yaxshilash va boshqalar bilan to‘g‘ri munosabatga kirishishda esa, ijtimoiy intellektning roli katta.

Guljahon Sanjarbekova tayyorladi.

• Foydali
• qiziqarli