Interpol kanallari orqali xalqaro qidiruvda bo‘lgan o‘zbekistonlik Gruziyadan ekstraditsiya qilindi. Bu haqda Ichki ishlar vazirligi xabar berdi.

Ma’lum qilinishicha, Interpol kanallari orqali O‘zbekiston Jinoyat kodeksining 118-moddasi 2-qismida nazarda tutilgan nomusga tegish jinoyatini sodir etganligi uchun qidiruvda bo‘lgan O‘zbekiston fuqarosi mamlakatga ekstraditsiya qilingan.

Qidiruvdagi shaxs Gruziya hududida bo‘lgan va xalqaro qidiruv doirasida qo‘lga olingan.

Ekstraditsiya O‘zbekiston va Gruziya Interpol xodimlarining muvofiqlashtirilgan o‘zaro hamkorligi va qo‘shma tezkor-qidiruv tadbirlari natijasida amalga oshirilgan.

Bu so‘nggi ikki oy ichida bu Gruziya tomonidan qidiruvda bo‘lgan O‘zbekiston fuqarolarining uchinchi marta ekstraditsiya qilinishidir.

Ekstraditsiya qilingan shaxs O‘zbekiston Interpol xodimlari hamrohligida O‘zbekiston hududiga olib kelinib, keyingi protsessual harakatlarni amalga oshirish va amaldagi qonunchilikka muvofiq javobgarlikka tortish uchun huquqni muhofaza qiluvchi organlar vakillariga topshirilgan.

• Gruziya
• Interpol
• O‘zbekistonlik