O‘zbekistonda xizmat ko‘rsatgan irrigator, suv xo‘jaligi sohasining taniqli mutaxassisi Ismoil Jo‘rabekov 28-sentyabr kuni 94 yoshida vafot etdi.

1931-yil 12-sentyabr kuni Samarqand viloyatida tug‘ilgan Jo‘rabekov, mustaqillikning ilk yillaridan boshlab qishloq xo‘jaligi va suv resurslari sohalarini boshqarishda muhim lavozimlarda ishlagan. U 1994–1998-yillarda Bosh vazir o‘rinbosari – qishloq va suv xo‘jaligi vaziri, 2000–2004-yillarda esa Prezidentning qishloq xo‘jaligi masalalari bo‘yicha davlat maslahatchisi lavozimlarida faoliyat yuritgan.

Uzoq yillik tanaffusdan so‘ng, Jo‘rabekov 2021-yilda Suv xo‘jaligi vaziri maslahatchisi sifatida davlat xizmatiga qaytgan edi.

Ko‘p yillik xizmatlari uchun u bir qator yuksak mukofotlarga sazovor bo‘lgan, jumladan: “Mehnat shuhrati” (1992), “El-yurt hurmati” (1994), “Buyuk xizmatlari uchun” (1996), “Do‘stlik” (2017), “Fidokorona xizmatlari uchun” (2021) ordenlari va boshqa faxriy unvonlar bilan taqdirlangan.

• Samarqand