Ijtimoiy tarmoqlarda “Bo‘stonliqda ayiqni vahshiylarcha o‘ldirishdi” mazmunidagi xabar bo‘yicha Toshkent viloyati Ekologiya boshqarmasi Bo‘stonliq tumani bo‘limi va Burchmulla davlat o‘rmon xo‘jaligi xodimlari tomonidan o‘rganish olib borildi. Bu haqda viloyat Ekologiya boshqarmasi matbuot xizmati xabar berdi.

Dastlabki ma’lumotlarga ko‘ra, Burchmulla davlat o‘rmon xo‘jaligining Qorong‘u-to‘qay bo‘limi Cho‘loqmergan hududida 1 dona Tyan-Shan qo‘ng‘ir ayig‘i taxminan 70-80 metr balandlikdagi qoya toshdan yiqilib tushganligi aniqlangan.

Tyan-Shan qo‘ng‘ir ayig‘i tanasidan nobud bo‘lish sabablari O‘zbekiston Fanlar akademiyasi Zoologiya instituti ekspertiza markazining xulosasiga asosan aniqlanadi. Ayiq tanasi xulosa natijalari chiqqunga qadar Burchmulla davlat o‘rmon xo‘jaligining tegishli bo‘limida vaqtincha saqlab turilishi ma’lum qilingan. Ekspertiza xulosasi natijalariga ko‘ra, huquqiy baho beriladi.

Holat Toshkent viloyati Ekologiya boshqarmasi tomonidan nazoratga olingan.

• Ayiq
• Davlat ekologiya qo'mitasi
• Ekspertiza