Forbes’ning xabar berishicha, AQSh prezidenti Donald Tramp va uning rafiqasi Melaniya Tramp 2024-yil noyabridan beri boyliklarini 3 milliard dollarga oshirib, jami 7,3 milliard dollarga yetkazishgan. Forbes tomonidan tuzilgan dunyoning eng boy odamlar ro‘yxatida Donald Tramp 118 pog‘ona yuqorilagan va hozir 201-o‘rinni egallab turibdi.

Jurnal ma’lumotlariga ko‘ra, boylikning katta qismi, taxminan 2 milliard dollar, Trampning kriptovalyutalarga qilgan investitsiyalari bilan bog‘liq.

Tramp, shuningdek, Nyu-York shtati apellyatsiya sudi firibgarlik ishida unga belgilagan jarimani bekor qilganidan so‘ng 500 million dollar tejagan. Bundan tashqari, Forbes ma’lumotlariga ko‘ra, Tramp o‘z ismini poyabzal, soatlar va parfyumeriya kabi mahsulotlarga litsenziyalash orqali qo‘shimcha 400 million dollar daromad olgan.

Donaldning rafiqasi Melaniya o‘zining chiqishlari, kitoblari va shaxsiy memkoin chiqarishi orqali oilaviy boylikni yana 200 million dollarga oshirgan.

“Prezidentning o‘g‘illari — kichik Donald va Erikning boyligi o‘tgan yildan beri mos ravishda 50 dan 500 million dollarga va 40 dan 750 million dollarga oshgan. Ular, shuningdek, American Bitcoin va World Liberty Financial kriptovalyuta kompaniyalaridagi ulushlarga egalik qilishadi. Qizi Ivankaning eri Jared Kushner esa Affinity Partners investitsiya kompaniyasi orqali asosan Qatar, Saudiya Arabistoni va BAA investorlaridan jami 4,6 milliard dollar jalb qilgach, milliarderga aylangan. Kushner, shuningdek, Trampning ko‘chmas mulk kompaniyasida 560 million dollarlik ulushga ega”, – deb yozmoqda Forbes.

• AQSh
• Boylik
• Forbes
• Prezident
• Tramp