Amerikalik xonanda va aktrisa Ledi Gaga AQSh prezidenti Jo Bayden tomonidan Madaniyat va san’at qo‘mitasi hamraisi etib tayinlandi. AQSh prezidenti Jo Baydenning bu haqidagi qarori Oq uy matbuot xizmati tomonidan e’lon qilingan.

Hujjatda Ledi Gaga (asl ismi Stefani Joann Anjelina Jermanotta)ning ijodiy faoliyati davomida 13 marta “Gremmi” mukofotini qo‘lga kiritgani, uning tarixdagi eng muvaffaqiyatli xonandalardan biri sanalishi, xayriya kampaniyalarida faol ishtirok etishi ta’kidlangan.

AQSh prezidenti taniqli prodyuser Bryus Koenni ham qo‘mita hamraisi lavozimiga tayinlagan. Musiqachi Jon Bastist, aktyorlar Jorj Kluni hamda Troy Kotsur, aktrisa Jennifer Garner, Kerri Vashington, Keti Makgrat, shuningdek, senariynavis Jonda Rayms ham qo‘mita a’zolariga aylanishgan.

Ma’lumot uchun, AQShning Madaniyat va san’at qo‘mitasi 1982-yilda tashkil topgan. Tuzilma AQSh prezidenti va boshqa rahbarlarga madaniyat sohasiga oid tavsiyalar berib keladi. 

• AQSh
• Bayden
• Madaniyat
• Shou-biznes
• mashhurlar