Olamshumul mashhurlikka erishgan “Kalmar oʻyini” seriali rejissyori va ssenariy muallifi Xvan Don Xyok uning yaratilish jarayoni haqida soʻzlab berdi. Ijodkorning aytishicha, bunday serialni suratga olish gʻoyasi 2008 yilda paydo boʻlgan, ammo mutaxassislar ssenariyni haddan tashqari shafqatsiz va tijoriy jihatdan muvaffaqiyatsiz deb baholashgan.

Don Xyok serialga tikiladigan mablagʻ va mehnat oʻzini oqmasligini taxmin qilib, boshqa loyihalarni boshlagan. Ammo, oradan 10 yildan koʻp vaqt oʻtib Koreyada seriallar rivojlanayotganini koʻrgan rejissyor gʻoyaga qaytadan ishlov berishni boshlagan. U serial konseptsiyasi bilan Koreyada endigina rivojlanayotgan “Netflix” kompaniyasiga murojaat qilgan. Shu tariqa serialni suratga olish ishlari boshlab yuborilgan.

“Oradan 10 yil vaqt oʻtib menga bu oʻta haqqoniy gʻoya ekani, dunyoning qaysidir bir yerida xuddi mana shunday voqealar sodir boʻlayotgani ehtimoli borligini aytishdi”, deydi Xvan.

Maʼlum boʻlishicha, mamlakatdagi boylar va nochor odamlar qatlami oʻrtasidagi jarlik kattalashib borgani sayin gʻoya dolzarblasha boshlagan. Rejissyor bugun Yer shiddat bilan aylanayotgani, odamlar oʻz orzularining ortidan borish oʻrniga oson pul topishga qiziqib ketganlarini kuzatgan.

Rejissyor serialdagi qoʻrqinchli sahnalar uning asosiy maqsadi boʻlmagani, bularning barchasi ramziy maʼnoga ega ekanligini aytib oʻtgan.

• Kino
• qiziqarli