21-may kuni Prezident Shavkat Mirziyoyev huzurida sog‘liqni saqlash sohasiga bag‘ishlangan yig‘ilishda bugun tibbiyot muassasalari yetarlicha raqamlashtirilmagani sababli sug‘urta tizimi to‘liq ishlamayotgani, shifokorlarning aksariyat vaqti hisobot to‘ldirishga ketayotgani ta’kidlangan edi.

Shu bois endilikda Toshkent shahrida sohani raqamlashtirish bo‘yicha namunaviy tizim yaratiladi. Buning uchun barcha muassasalar yangi kompyuter va texnika vositalari bilan jihozlanib, yil yakunigacha “Elektron poliklinika” va “Elektron shifoxona” tizimlari ishga tushiriladi.

“2024-yil poytaxtda davlat tibbiy sug‘urta mexanizmlari joriy etiladi. Bu aholi tomonidan to‘lanayotgan umumiy soliqlar hisobidan bo‘lib, odamlardan qo‘shimcha badallar undirilmaydi”, – deyiladi xabarda.

Tibbiy sug‘urta doirasida:

davlat tomonidan aholiga bepul ko‘rsatiladigan tibbiy xizmatlar va dori vositalarining kafolatlangan paketi joriy etiladi;

bemorlarni o‘zlari biriktirilgan oilaviy shifokorlar orqali tor soha mutaxassislariga yoki shifoxonalarga yo‘llash tizimi tashkil etiladi. Bunda ushbu tartibga rioya qilingan holdagina bepul tibbiy xizmatlar ko‘rsatiladi;

aholiga kafolatlangan paket doirasida eng ko‘p uchraydigan kasalliklar bo‘yicha dori vositalari elektron retsept asosida dorixonalar orqali bepul beriladi;

moliyalashtirishning natijaga asoslangan usullari (jon boshiga va davolangan holatlar bo‘yicha) joriy etiladi;

tuman, viloyat va respublika darajasida davolanadigan kasalliklar ro‘yxati belgilanadi.

• Prezident
• SSV