Shu yilning 11-sentyabr kuni Qozog‘istonning Olmaota viloyatida metall qabul qilish shoxobchasida sodir bo‘lgan portlash oqibatida 3 nafar o‘zbekistonlik halok bo‘ldi. Bu haqda Zakon.kz xabar bermoqda.

“Olmaota viloyatining Iliy tumanida joylashgan metall qabul qilish shoxobchalaridan birida yuz bergan fojiali hodisa bo‘yicha politsiya jinoyat ishi qo‘zg‘atdi. Noma’lum predmet portlashi oqibatida uch kishi jasadi hayot alomatlarisiz topildi. Hodisa joyiga darhol tezkor xizmatlar – politsiya, yong‘in xavfsizligi xodimlari va tez tibbiy yordam brigadasi yetib bordi”, – deyiladi nashr xabarida.

“Bizning ortimizda sex bor. Uni xitoyliklar ijaraga olgan. Aftidan, ular o‘z vaqtida arzon narxda metallolom sotib olishgan. O‘zlari ham bilishmagan. Shular orasida Mudofaa vazirligidan chiqqan metall chiqindilari bo‘lishi mumkin. Lekin ular orasida portlamagan minalar ham chiqqan, deb o‘ylayman. Hozir barcha kuch tuzilmalari kelgan, tekshirishmoqda”, – deya ma’lumot bergan shoxobcha egasi Amirbek Sherbayev.

Nur.kz’ga ko‘ra, voqea joyida kriminalistlar va Mudofaa vazirligi vakillari ishlamoqda. Hududga hech kim kiritilmayapti. Halok bo‘lganlarning shaxsi aniqlangan. Ular ishchilar ekani va barchasi O‘zbekiston fuqarolari ekani ma’lum qilingan.

• O‘zbekistonlik
• Qozog‘iston
• fuqaro
• portlash