The Insider Nashrning xabar berishicha, Buyuk Britaniya, Shvetsiya, Fransiya, Germaniya va Niderlandiya rossiyalik muxolif siyosatchi Aleksey Navalniyning biomaterial namunalari tahlilini o‘tkazgan.

Ma’lum qilinishicha, bir nechta mustaqil laboratoriyalar ushbu namunalarda Janubiy Amerikadagi qurbaqasi terisidan olinadigan o‘ta zaharli modda — epibatidinni aniqlagan.

Siyosatchi “Novichok” moddasi bilan zaharlanganidan so‘ng uni davolagan reanimatolog shifokor Aleksandr Polupanning so‘zlariga ko‘ra, Aleksey Navalniyda o‘limidan oldin kuzatilgan simptomlari epibatidinning ta’siri haqida ma’lum bo‘lgan ma’lumotlarga mos keladi.

Besh davlatning qo‘shma bayonoti Buyuk Britaniya hukumati rasmiy saytida e’lon qilindi.

“Buyuk Britaniya, Shvetsiya, Fransiya, Germaniya va Niderlandiya Aleksey Navalniy o‘ta xavfli toksin bilan zaharlanganiga ishonch bildiradi. Bu Aleksey Navalniydan olingan namunalarning tahlillariga asoslangan hukumatlarimiz xulosalaridir. Ushbu tahlillar namunalarda epibatidinning mavjudligini aniq tasdiqladi.

Epibatidinning zaharliligi va tasvirlangan simptomlarni inobatga olgan holda, o‘limning eng ehtimoliy sababi zaharlanish bo‘lgan. Navalniy Rossiya qamoqxonasida vafot etdi, bu esa Rossiyada unga ushbu zaharni yuborish uchun vosita, sabab va imkoniyat bo‘lganini anglatadi”, – deyiladi qo‘shma bayonotda.

Marhum siyosatchining bevasi ham X ijtimoiy tarmog‘ida shu kabi ma’lumotlarga bag‘ishlangan post qoldirdi.

“Beshta Yevropa davlatining olimlari turmush o‘rtog‘im Aleksey Navalniy epibatidin — yer yuzidagi eng kuchli zaharlardan biri bo‘lgan neyrotoksin bilan zaharlanganini aniqladi. Tabiatda bu zahar Ekvador daraxt qurbaqasining terisida uchraydi. U falajlikka, nafas olishning to‘xtashiga va azobli o‘limga olib keladi.

Men birinchi kunlardanoq turmush o‘rtog‘im zaharlanganiga ishonardim, ammo endi bunga dalillar bor. Vladimir Putin Alekseyni kimyoviy qurol bilan o‘ldirdi. Ikki yil davomida sinchkovlik bilan ish olib borgan va haqiqatni ochib bergan Yevropa davlatlariga minnatdorlik bildiraman”, — deb yozdi Yuliya Navalnaya.

• Aleksey Navalniy
• Zaharlanish