Londonning markazidagi mashhur Lester maydoni yaqinidagi Koventri-strit musulmonlarning muqaddas Ramazon oyi sharafiga birinchi marta 30 ming lampochkadan iborat chiroqlar konsepsiyasi bilan yoritildi. Bu haqda Britaniya radioeshittirish korporatsiyasi BBC tadbir tashkilotchisi Aisha Desayga tayanib xabar berdi.

Shaharning turistik diqqatga sazovor joylaridan biri bo‘lgan ko‘chada chiroqlar bilan “Ramazon oyi muborak” deb yozilgan.

Musulmon tashkilotlari va xalqning xayr-ehsonlari bilan qilingan Ramazon chiroqlari kontseptsiyasi Rojdestvo chiroqlaridan ilhomlangan Ayshe Desai tomonidan tayyorlangan.

"Men singlim bilan Rojdestvo chiroqlarini tomosha qilganimni esladim. Bu menga yoqqan edi. Men Yaqin Sharqda yashaganman va [Ramazonning] quvonchi va sehrini Londonga olib kelishni xohlardim",– dedi Desai.

Tashkilotchining so‘zlariga ko‘ra, u bu ishi orqali London aholisini muqaddas musulmon oyi bilan “yaqinroq tanishtirish”ga ham intilgan.

Chiroqlar Londonning 1,3 million musulmonlaridan biri London meri Sadiq Xon tomonidan yoqildi.

Londonliklardan tashqari xorijlik sayyohlar ham ko‘chadagi yoritishga katta qiziqish bildirishgan.

Chiroqlar bugun, 23-apreldan boshlab, to ramazon oyi oxiriga qadar har kuni mahalliy vaqt bilan soat 17:00 dan 01:00 gacha ko‘chani yoritadi.

• Chiroqchi
• London
• Ramazon