O‘zbekistonda maktablar, shifoxonalar va sport inshootlarini qurish hamda ta’mirlashga ixtisoslashgan yangi jamg‘arma tashkil etiladi. Prezident Shavkat Mirziyoyevning 2025-yil 30-dekabrdagi “Ta’lim, sog‘liqni saqlash va sport tizimini barqaror rivojlantirishni ta’minlash chora-tadbirlari to‘g‘risida”gi qarori bilan “Ijtimoiy soha muassasalarini qurish va ta’mirlash jamg‘armasi”ni ta’sis etish belgilandi.

Yangi jamg‘arma hisobidan ta’lim, sog‘liqni saqlash va sport sohalaridagi obyektlarni qurish, rekonstruksiya qilish va kapital ta’mirlash ishlari moliyalashtiriladi. Shuningdek, maktablar, sport inshootlari va tibbiyot muassasalarini asbob-uskunalar, texnika va muhandislik infratuzilmasi bilan ta’minlash ham jamg‘armaning asosiy vazifalari qatoriga kiritildi.

Jamg‘armaga dastlab Davlat ijtimoiy himoya jamg‘armasidan 2 trln so‘m o‘tkaziladi. Bundan tashqari, 2026-yil boshiga kelib 55 ta respublika ijro etuvchi hokimiyat organlari huzuridagi byudjetdan tashqari jamg‘armalar qoldig‘ining 50 foizigacha qismi ushbu jamg‘armaga yo‘naltiriladi.

Ayrim tashkilotlar uchun alohida me’yorlar belgilangan. Xususan, Pedagogik mahorat ilmiy-amaliy markazi hamda Investitsiyalar, sanoat va savdo vazirligi huzuridagi jamg‘armalar qoldig‘ining 10 foizi o‘tkaziladi. “O‘zatom”, Bilim va malaka baholash agentligi hamda IIV huzuridagi migratsiya va personalizatsiya departamenti jamg‘armalari esa qoldiq mablag‘larining 20 foizini ajratishi kerak.

Prezident dekabr oyi oxiridagi Oliy Majlis va O‘zbekiston xalqiga Murojaatnomasida mahallalardagi muammolarni hal qilish uchun qo‘shimcha moliyaviy resurslar ajratilishini ma’lum qilgan edi. Rejaga ko‘ra, mahalliy byudjetlar daromadlari kamida ikki barobarga oshiriladi. Shuningdek, qator soliq va yig‘imlar hududlarda qoldirilib, tumanlar infratuzilmasi uchun qo‘shimcha 5 trln so‘m yo‘naltirilishi kutilmoqda.

• Maktab
• Prezident
• Qaror
• Shavkat Mirziyoyev
• shifoxona