Matematika fanidan asosiy olimpiadaning tuman (shahar) bosqichi savollari respublika bo‘ylab noqonuniy tarzda tarqatildi. Bu ma’lumotni Ixtisoslashtirilgan ta’lim muassasalari agentligi tasdiqladi.

14-oktyabrdan maktab o‘quvchilari uchun asosiy fan olimpiadasining ikkinchi - tuman (shahar) bosqichiga start berilgandi. Olimpiadaning mazkur bosqichi 14-oktyabrdan 23-oktyabrgacha o‘tkazilishi belgilangan bo‘lib, kecha, 14-oktyabr kuni matematika fanidan 3 smenada olimpiada o‘tkazilgan. Ammo Xalqtaliminfo’ning yozishicha, olimpiada ishtirokchilari uchun tuzilgan test savollari ertalab soat 7:00 da ijtimoiy tarmoqlarda tarqalib ketgan.

Ayrim pedagoglarning aytishicha, mazkur test savollari 14-oktyabr kuni ertalab 800 ming so‘mdan sotilgan. Kunning ikkinchi yarmida esa test savollari narxi 200 ming so‘mgacha pastlagan.

Matematika fanidan 10-sinflar uchun tuzilgan test savollari an’anaviy ravishda olimpiada jarayoni yakunlangach, soat 15:58 da Ixtisoslashtirilgan ta’lim muassasalari agentligi huzuridagi Fan olimpiadalari markazining rasmiy Telegram sahifasida e’lon qilingan. Shundan so‘ng pedagoglar mazkur testlarni ertalab ijtimoiy tarmoqlarda tarqalgan testlar bilan solishtirib ko‘rib, ular aynan bir xil test savollari ekanligining guvoh bo‘lishgan.

Ixtisoslashtirilgan ta’lim muassasalari agentligi ayni paytda mazkur holat yuzasidan tegishli o‘rganish ishlari olib borilayotganligini ma’lum qildi.

“Hozirda bu holatga sababchi shaxslar aniqlanmoqda va ular amaldagi qonunchilik doirasida javobgarlikka tortiladi”, – deyiladi agentlik xabarida.

Matematika fanidan asosiy olimpiadaning tuman (shahar) bosqichi har bir sinf kesimida (9-10-11-sinf) qayta o‘tkaziladi.

Shuningdek, agentlik olimpiada savollari yoki javoblari pul evaziga taklif qilinsa, jarayonlarga tanish-bilishchilik yoki noqonuniy ta’sir ko‘rsatish holatlari bo‘lsa, bu haqda darhol Fan olimpiadalari markazining maxsus boti yoki +998 71 207 05 24 telefon raqami orqali xabar berishni so‘ragan.

• Olimpiada
• shahar