JSST maymun chechagiga qarshi ikkinchi vaksinani tasdiqladi. Uni bolalarda ham qo‘llash mumkin. Bu haqda Sog‘liqni saqlash vazirligi matbuot xizmati xabar bermoqda.

Yaponiyaning “KM Biologics” kompaniyasi tomonidan ishlab chiqilgan ushbu emlash vositasi “LC16m8” deb nomlanadi.

Qayd etilishicha, shu yil sentyabr oyida foydalanish uchun ruxsat etilgan Daniyaning “Bavarian Nordic A/S” kompaniyasiga tegishli “MVA-BN” nomli ilk emlash preparati 18 yoshdan oshganlarda qo‘llashga mo‘ljallangan edi.

Yaponiyada ishlab chiqarilgan yangi vaksinani esa nafaqat kattalar, balki bir yoshdan oshgan bolalar ham favqulodda holatlarda qabul qilishi mumkin.

JSST bayonotida aytilishicha, Yaponiya hukumati maymun chechagi epidemiyasi avj olgan Kongo Demokratik Respublikasiga ushbu vaksinadan 3 million dozasini beg‘araz yordam sifatida yetkazib berishga qaror qilgan.

Sentyabr oyida dunyo bo‘yicha mpox infeksiyasiga chalinish holatlari rekord darajaga yetib, 2 763 ta yangi kasallanish holati ro‘yxatga olingan edi. Aniqlangan bemorlarning asosiy qismi esa Afrika mintaqasi aholisi hissasiga to‘g‘ri kelgan.

• Vaksina