Prezident Shavkat Mirziyoyev Markaziy Osiyo va Ozarbayjon davlat rahbarlarining sakkizinchi Maslahat uchrashuvida mintaqaviy hamkorlikni yangi bosqichga olib chiqish bo‘yicha qator takliflarni ilgari surdi.

Davlat rahbari so‘nggi yillarda Markaziy Osiyodagi munosabatlar muhiti sezilarli o‘zgarganini ta’kidladi. Unga ko‘ra, davlat rahbarlari muntazam uchrashib, masalalarni ochiq muhokama qilmoqda, umumiy yechimlar topib, bir-birini qo‘llab-quvvatlamoqda. Shuningdek, XXI asrda mintaqani rivojlantirishga qaratilgan Do‘stlik, yaxshi qo‘shnichilik va hamkorlik to‘g‘risidagi shartnomani tuzish jarayonlarining yakunlanishi tarixiy voqea sifatida qayd etildi.

Mirziyoyev Markaziy Osiyo va qo‘shni mintaqalar o‘rtasidagi hamkorlikning navbatdagi bosqichini belgilash zarurligini bildirdi. Shu maqsadda davlat rahbarlari Maslahat uchrashuvlari faoliyatini tartibga soluvchi normativ-huquqiy bazani takomillashtirish bo‘yicha ishlarni davom ettirish taklif qilindi.

Prezident iqtisodiy hamkorlikni ham yangi darajaga olib chiqish zarurligini ta’kidladi. Savdo va investitsiyalar hajmini oshirish bilan birga, davlatlar o‘rtasida yakuniy mahsulot ishlab chiqarishga e’tibor qaratish lozimligi qayd etildi. Bu borada “Olti iqtisodiyot – bitta mahsulot” formulasi ilgari surilib, 2027 yilda Xiva shahrida Markaziy Osiyo va Ozarbayjon biznes forumini o‘tkazish taklif qilindi.

Shuningdek, qo‘shma investitsiya loyihalarini moliyaviy-texnik jihatdan qo‘llab-quvvatlash uchun maxsus platforma yaratish taklif etildi. Mintaqani global savdoning quruqlikdagi muhim yo‘nalishlaridan biri va yirik iqtisodiy faollik markaziga aylantirish maqsadida Infratuzilmaviy rivojlanish bo‘yicha kengash tuzishni tezlashtirish hamda uning birinchi majlisini O‘zbekistonda o‘tkazish tashabbusi ilgari surildi.