Yaponiya tashqi ishlar vazirligi Ukrainada olib borilayotgan maxsus operatsiya tufayli Rossiyaga nisbatan sanksiyalar ro‘yxati kengaytirilganini ma’lum qildi. Rossiya, Donesk va Lugansk xalq respublikalaridan 141 nafar amaldor, shuningdek, Rossiyaning 71 ta kompaniyasi sanksiyalar ostida qolgan. 

“Vazirlar mahkamasi Rossiya Federatsiyasi (8 kishi), Donesk Xalq respublikasi va Lugansk Xalq respublikasi (133 kishi) mansabdor shaxslarining aktivlarini muzlatishga kelishib oldi”, – deyiladi Yaponiya TIV saytida.

Xususan, cheklovlar Rossiya bosh vaziri Mixail Mishustin, Rossiya Federatsiyasi xavfsizlik kengashi kotibi o‘rinbosari Rashid Nurgaliyev va Donbass respublikalari rahbariyatiga taalluqlidir.

Bundan tashqari, Yaponiya Rossiyaning 71 kompaniyasiga, xususan, Almaz-Antey, VNII Etalon, Inteltech, Taktik raketa korporatsiyasi va boshqalarga nisbatan mahsulotlarni eksport qilishni taqiqladi.

Qayd etish joiz, joriy yil 12-maydan boshlab Yaponiyaning Sberbank va Alfa-Bank aktivlariga nisbatan sanksiyalari kuchga kiradi. Ular bilan birga Rossiyadan 398 nafar jismoniy va 28 yuridik shaxs qora ro‘yxatga kiritilgan. 

• Bosh vazir
• Jahon
• Rossiya
• Sanksiya
• Yaponiya