IBF tomonidan Murodjon Ahmadaliyev hamda filippinlik Marlon Tapales oʻrtasidagi jangga buyruq berilgandi.

Kecha IBFʼning Nyu-Jersidagi shtab-kvartirasida ikkinchi eng yengil vazn toifasi (-55 kg)da IBF va WBA kamarlari sohibi Murodjon Ahmadaliyev (11-0) hamda filippinlik Marlon Tapales (36-3) ishtirokidagi chempionlik jangi uchun promouterlik savdosi oʻtkazilishi lozim edi. Ammo har ikki tomon bu borada oʻzaro kelishuvga erishgani uchun auksion bekor qilindi.

Ikkala tomon ham moliyaviy masalada kelishib olishgan. Hozircha jang sanasi va manzili maʼlum emas. Katta ehtimol bilan Ahmadaliyevning toʻrtinchi himoya jangi aprel oyida boʻlib oʻtadi.

Qayd etish mumkin, Ahmadaliyev 2022-yil iyun oyida amerikalik Ronni Rios (33-3)ni magʻlubiyatga uchratib, oʻziga tegishli WBA va IBF kamarlarini uchinchi bor muvaffaqiyatli himoya qilgan edi.

Tapales esa oxirgi jangini oʻtgan yilning may oyida meksikalik Xose Estrella (23-19-1)ga qarshi oʻtkazib, muddatidan avval gʻalaba qozongan.

• Boks
• Murodjon Ahmadaliyev