O‘zbekiston Musulmonlari idorasi fatvo hayʼatining milodiy 2022-yilgi zakot nisobi, fitr sadaqa va fidya miqdori bo‘yicha qarori eʼlon qilindi.

Unga ko‘ra, 2022-yil (hijriy 1443) uchun:

Zakotning tillodan nisobi 85 gramm bo‘lib, bugungi kunda 1 gramm tilloning o‘rtacha narxi 400 000 (to‘rt yuz ming) so‘m ekani eʼtiboridan, bu yilgi Zakot nisobi 34 000 000 (o‘ttiz to‘rt million) so‘m deb belgilandi.

Shunga ko‘ra, zarur ehtiyojdan tashqari bir yil davomida 34 mln so‘m va undan ortiq mablag‘ga ega bo‘lgan musulmon kishi jami mablag‘ining qirqdan biri (1/40)ni zakot niyatida kambag‘al va faqirlarga beradi.

Fitr sadaqasining miqdori bug‘doydan yarim soʼ (2 kg.), arpadan bir soʼ (4 kg.), mayizdan yarim soʼ (2 kg.) va xurmodan bir soʼ (4 kg.)dir.

Bugungi kunda mazkur mahsulotlarning Toshkent shahar bozorlaridagi narxlari o‘rganilganda 1 kg bug‘doy o‘rtacha 5 ming so‘m, 1 kg arpa o‘rtacha 4 ming so‘m, 1 kg mayiz o‘rtacha 50 ming so‘m va 1 kg xurmo o‘rtacha 40 ming so‘m ekani maʼlum bo‘ldi.

Shunga ko‘ra, bu yilgi Fitr sadaqasining miqdori:

– bug‘doydan 2 kg 10 000 (o‘n ming) so‘m;

– arpadan 4 kg 16 000 (o‘n olti ming) so‘m;

– mayizdan 2 kg 100 000 (yuz ming) so‘m;

– xurmodan 4 kg 160 000 (bir oltmish ming) so‘m deb belgilandi.

Har kim o‘z imkoniyatiga qarab ushbu to‘rt mahsulotning xohlagan bir turidan fitr sadaqasini bersa kifoya qiladi.

Fidya miqdori bir miskinning bir kunlik oziq-ovqati qiymatida bo‘lib, bugungi kunda bu o‘rtacha 25 000 (yigirma besh ming) so‘mga to‘g‘ri kelganidan, bu yilgi Fidya miqdori bir kun uchun 25 000 (yigirma besh ming) so‘m, bir oyga 750 000 (yetti yuz ellik ming) so‘m deb belgilandi.

Eslatma: Mazkur qiymatlar Toshkent shahar bozorlaridagi narxga asosan belgilandi. Har bir viloyat o‘z bozorlaridagi narxga qarab fitr sadaqasini belgilaydi.

• Fidya
• Fitr
• O‘zbekiston musulmonlari idorasi
• Zakot