Nursulton Nazarboyev Qozog‘istonning hukmron partiyasi bo‘lmish "Nur Otan" ning raisligini hozirgi prezident To‘qayevga bo‘shatib berаdi. Bu haqda uning matbuot kotibi Aydos Ukibay o‘zining Tvitter sahifasida maʼlum qildi. 

81 yoshli Nazarboyev Partiya siyosiy kengashining kengaytirilgan yig‘ilishida "Nur Otan"ga amaldagi prezident Qosim-Jo‘mart To‘qayev rahbarlik qilishi zarurligini maʼlum qilgan. Bu partiyani u 1999-yildan beri boshqarib kelayotgan edi. Partiyaning yangi yetakchisi saylanguniga qadar, hozircha Nazarboyev bu mavqeni o‘zida saqlab turadi.

Aydos Ukibayning taʼkidlashicha, Nazarboyevning bu qarori 2019-yilda boshlangan hokimiyatni topshirish jarayonining uzviy davomidir. "Nursulton Nazarboyevning fikricha, "Nur Otan" pandemiya sababli yuzaga kelgan inqiroz vaqtida Qozog‘iston prezidentining asosiy tayanchi bo‘lishi kerak"  – deya vaziyatga izoh bergan Aydos Ukibay.

Maʼlumot uchun, Nursulton Nazarboyev qariyb 30 yil davomida Qozog‘istonni boshqargan. 2019-yilning mart oyida esa u prezidentlik lavozimidan isteʼfo bergandi, ammo o‘shanda u o‘zida "Nur Otan" partiyasi va Qozog‘iston Xavfsizlik kengashi raisi lavozimlarini saqlab qolgandi.

• Prezident
• Qozog‘iston