Al Jazeera xabariga ko‘ra, XAMAS G‘azo bo‘yicha tuzilgan Tinchlik kengashidan Isroilning o‘t ochishini to‘xtatishni ta’minlashga chaqirdi. Tinchlik kengashining ilk yig‘ilishi 19-fevral kuni Vashingtonda bo‘lib o‘tadi. Ayni paytda urushdan jabr ko‘rgan G‘azodagi falastinliklar tinchlik kelishuvining ikkinchi bosqichi to‘liq kuchga kirishini kutmoqda.

“G‘azoga qarshi genotsid hali ham davom etmoqda, o‘ldirish, ko‘chirish, qamal va ochlik hali ham to‘xtamagan”, – dedi XAMAS vakili Hazim Qosim.

XAMAS–Isroil sulh bitimi 2025-yil 10-oktyabrda boshlanganidan beri G‘azoda 600 dan ortiq falastinlik halok bo‘ldi, kamida 1600 kishi jarohatlandi.

Qosim o‘z murojaatida Tinchlik kengashini G‘azoni boshqarish uchun tanlangan texnokratlar qo‘mitasining hududga kirishini ta’minlashga va qayta qurish ishlarini boshlashga chaqirdi.

“Biz G‘azo qamalini bekor qilish va chegarada o‘tish punktlarini ochishga chaqiramiz, ularni qisman ochish bilangina cheklanmaslik kerak. Isroil ushbu kengashdan G‘azodagi urushni davom ettirish va qayta tiklash ishlariga to‘sqinlik qilish uchun niqob sifatida foydalanishidan ogohlantiramiz”, – dedi u.

19-fevral kuni Tinchlik kengashi yetakchilarining uchrashuvida a’zo davlatlar 5 milliard dollardan ortiq mablag‘ ajratishi kutilmoqda. Bu mablag‘lar G‘azoga gumanitar yordam va tiklash ishlashi uchun sarflanadi.

• AQSh
• G‘azo
• Isroil