24-yanvar kuni mahalliy vaqt bilan 20:00 lar atrofida Istanbul shahrining Shishli tumanida Quyuulibog‘ ko‘chasidagi chiqindi konteynerlaridan birida ayol kishining choyshabga o‘ralgan jasadi topilgan.

Dastlabki ma’lumotlarga ko‘ra, jasadni mahallada chiqindilarni saralab yuruvchi shaxs topgan. U darhol mash’um topilma haqida politsiyaga xabar bergan. Shundan so‘ng hudud o‘rab olinib, dalillarni yig‘ish ishlari olib borilgan.

Ayolning boshi va kesib olingan oyoqlari solingan jomadon hududdagi boshqa chiqindixonadan topilgani aytilmoqda.

Holat bo‘yicha keng qamrovli tergov ishlari boshlab yuborilgan. Huquq-tartibot idoralari ma’lumotlariga ko‘ra, voqea 24-yanvar kuni kechqurun ro‘y bergan. Hududga politsiya va kriminalistika guruhlari jalb etilib, jasad sud-tibbiy ekspertizaga yuborilgan.

Tergov jarayonida ayolning shaxsi aniqlanib, u 37 yoshli O‘zbekiston fuqarosi Durdona Hakimova ekani ma’lum bo‘lgan. Ushbu jinoiy ish bo‘yicha Istanbul prokuraturasi tomonidan jinoyat ishi qo‘zg‘atilgan.

Rasmiylar ish jamoatchilik nazoratida ekanini ta’kidlab, barcha versiyalar ko‘rib chiqilayotganini bildirgan.

Shuningdek, aeroport orqali Gruziyaga qochmoqchi bo‘lgan o‘zbekistonlik ikki gumondor ushlangani xabar berilmoqda.

Istanbul prokuraturasi natijalar bo‘yicha qo‘shimcha ma’lumot berilishini ma’lum qilgan.

• Istanbul
• O‘zbekistonlik
• Qotillik
• Turkiya
• fuqaro