Tanzaniyada prezidentlik saylovlaridan keyin ommaviy norozilik namoyishlari boshlandi. Muxolifat faollar va xavfsizlik kuchlari o‘rtasidagi uch kunlik to‘qnashuvlarda 700 ga yaqin odam halok bo‘lganini da’vo qilmoqda. Bu haqda Reuters xabar bermoqda.

Norozilik namoyishlari mamlakatning eng yirik shaharlari, jumladan, poytaxt Dar as-Salomga ham yoyilgan. Namoyishchilar, asosan yoshlar, muxolifatning asosiy nomzodlari diskvalifikatsiya qilingani sababli ovoz berishni boykot qildi. Tanzaniya armiyasi boshlig‘ining talablariga qaramay, norozilik namoyishlari juma kuni davom etdi va politsiya va harbiylar bilan to‘qnashuvlar bilan yakunlandi.

Muxolifat partiyasi Chadema vakili Jon Kitokaning ta’kidlashicha, partiya chorshanba kunidan beri tibbiyot xodimlarining hisobotlariga asoslanib, 700 ga yaqin o‘limni hujjatlashtirgan.

Tanzaniya Tashqi ishlar vaziri Mahmud Kombo Sobit namoyishchilar bilan to‘qnashuvlarni “alohida hodisa” deb atadi va xavfsizlik kuchlarini tezkor va qat’iy javob uchun olqishladi. U mamlakatda internetning to‘liq o‘chirilishi tartibsizliklarni to‘xtatish uchun zarur chora sifatida baholadi.

Avvalroq, 29-oktyabr kuni, prezidentlik saylovlaridan keyingi norozilik namoyishlari ortidan Tanzaniyaning eng yirik shahri Dar as-Salomga qo‘shinlar kiritilgan edi.

• Afrika
• Namoyish
• norozilik
• saylov