Kanada Bosh vaziri Mark Karni 1-noyabr kuni AQSh Prezidenti Donald Trampdan tariflarga qarshi siyosiy reklama uchun uzr so‘raganini va Ontario bosh vaziri Dag Fordga uni namoyish qilmaslikni aytganini ma’lum qildi.

Janubiy Koreyada bo‘lib o‘tgan Osiyo – Tinch okeani sammitida qatnashganidan keyin jurnalistlar bilan suhbatlashgan Karni, 29-oktyabr kuni Janubiy Koreya Prezidenti tomonidan uyushtirilgan kechki ovqatda Trampdan shaxsiy ravishda uzr so‘raganini aytdi. Shuningdek u: “Men Fordga reklamani davom ettirishni xohlamasligimni aytdim”, – deya reklamani Ford bilan efirga uzatishdan oldin ko‘rib chiqqanini, ammo undan foydalanishga qarshi bo‘lganini ta’kidlagan.

Shu hafta boshida Janubiy Koreyadan jo‘nab ketayotganda, Tramp o‘sha kechki ovqatda Karni bilan “juda yoqimli” suhbatlashganini ma’lum qildi, ammo bu haqda batafsil ma’lumot bermadi. 31-oktyabr kuni Tramp hali ham Qo‘shma Shtatlar va Kanada savdo muzokaralarini qayta boshlamasligini bildirgan.

Eslatib o‘tamiz, AQSh prezidenti Donald Tramp Kanadaning Ontario provinsiyasi hukumati tomonidan e’lon qilingan reklama sabab Kanada tovarlariga nisbatan bojlarni qo‘shimcha 10 foizga oshirgan edi.

• AQSh
• Bosh vazir
• Kanada
• Tramp