O‘zbekistonda diniy sohada amalga oshirilayotgan islohotlar natijasida fuqarolarning “Haj” va “Umra” amallarini xavfsiz hamda munosib bajarishlari uchun yetarlicha shart-sharoitlar yaratilgan.

Shunga qaramasdan, respublikada amalda bo‘lgan tartib-qoidalarni chetlab o‘tgan holda, fuqarolarni Saudiya Arabistoniga ziyoratga yuborishga urinish holatlari uchrab turibdi.

Huquq-tartibot idoralari tomonidan joylarda o‘tkazilgan tezkor tadbirlar davomida shu kabi qonunbuzilishlarga chek qo‘yilgan.

Jumladan, Namangan shahrida yashovchi, 1966-yilda tug‘ilgan O.S. mahalliy fuqaro hamda uning onasini turizm yo‘nalishida faoliyat yurituvchi MChJ orqali 2025-yilgi “Haj” mavsumida Saudiya Arabistoniga farz amallarini bajarish uchun yuborish evaziga 10 ming AQSh dollari olgan vaqtida ashyoviy dalillar bilan ushlangan.

Yana bir holatda, Guliston shahrida faoliyat yurituvchi sayyohlik firmasi ta’sischisi G‘.A. tegishli litsenziyaga ega bo‘lmasa-da, Sirdaryo tumanida yashovchi fuqaro va uning 4 nafar qarindoshini “Umra” ziyoratiga yuborish evaziga 6000 AQSh dollari talab qilib, oldindan 400 AQSh dollari va 1,3 mln so‘m olgan vaqtida ushlangan.

Bunday noqonuniy holatlar Surxondaryo viloyatida ham qayd etilgan. Xususan, Sariosiyo tumanidagi sayyohlik firmasi ishchisi D.R. hech qanday vakolati bo‘lmasa-da, mahalliy fuqaroni “Umra” amallarini bajarish uchun Saudiya Arabistoniga yuborish evaziga 1100 AQSh dollari va 200 ming so‘m olgan vaqtida ushlangan.

Hozirda barcha holatlar yuzasidan mazkur shaxslarga nisbatan Jinoyat Kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari olib borilmoqda.

• Firibgarlik
• Haj
• Umra