Saudiyaning “Al-Hilol” hamda O‘zbekistonning “Navbahor” klublari Osiyo chempionlar ligasining 1-tur uchrashuvida durrang o‘ynadi. Ar-Riyoddagi “Qirol Fahd” stadionida kechgan uchrashuv 1:1 hisobida yakunlandi.

“Navbahor” safida 52-daqiqada Toma Tabatadze “Al-Hilol” darvozasiga gol kiritdi.

Saudiya Arabistoni jamoasi hujumchisi Neymar “Navbahor”ga qarshi o‘yinning 60-daqiqasida, “Navbahor” futbolchilaridan biri bilan mojaroga uchradi. Braziliyalik raqibini atayin turtib yubordi va yiqilib tushganda unga qarata to‘p tepdi.

Uchrashuvning bosh hakami braziliyalikga ushbu qoidabuzarligi uchun sariq kartochka ko'rsatdi.

Saudiya Arabistoni tarkibida Malkom, Neymar va Aleksandr Mitrovich o'ynagan. O‘yinning 90 daqiqasi O‘zbekiston foydasiga hal bo‘layotgan edi, biroq hakam yana 14 daqiqa qo‘shib berdi. Uning bu qarori ijtimoiy tarmoqlarda keskin tanqidlarga uchradi va kulgi ostiga olindi.

“Al-Hilol” 100-daqiqagacha mag‘lub bo‘layotgandi, biroq Ali Al-Bulayhiy gol urib, jamoasini mag‘lubiyatdan qutqarib qoldi.

Javob o'yini joriy yilning 28-noyabr kuni O'zbekistonda bo'lib o'tadi.

• Al-Hilol
• Navbahor