OIV epidemiyasi boshlangandan buyon 75 milliondan ortiq kishi OIV infeksiyasi bilan kasallangan. Bu haqda AOKAda Sanitariya-epidemiologik osoyishtalik va jamoat salomatligi xizmati, Respublika OITSga qarshi kurash markazi mutasaddilari ishtirokida oʻtkazilayotgan matbuot anjumanida maʼlum qilindi.

Keltirilishicha, OIV epidemiyasi boshlangandan buyon 75 milliondan ortiq kishi OIV infeksiyasi bilan kasallangan. OIV infeksiyasining tarqalishi asosan birmuncha faol yoshda, yaʼni 25-49 yoshlar oʻrtasida koʻproq uchramoqda, bu 75,6 foizni tashkil etadi.

Taʼkidlanishicha, 2019-2020 yillarda Oʻzbekistonning 2 ta yirik shaharlari Toshkent va Samarqand OIV infeksiyasi tarqalishiga qarshi kurashish va aholi sogʻligʻini yaxshilash toʻgʻrisidagi “Parij deklaratsiyasi” deb nomlanadigan butunjahon tashabbusiga qoʻshilgan.

Shuningdek, pandemiya davrida oʻz vataniga qaytib kelgan 261 394 nafar mehnat muhojirlarining 80 foizga yaqini OIV infeksiyasiga tekshiruvlar bilan qamrab olingan va OIV aniqlangan holatlarda dispanser nazoratiga olingan.

Maʼlum qilinishicha, 2006-yildan boshlab JSSTning tavsiyalariga muvofiq, OIV infeksiyasining onadan bolaga yuqishini oldini olish dasturi joriy etilgan. Unga koʻra har yili oʻrtacha 600 ming homilador OIV infeksiyasiga tekshiriladi.

OIV infeksiyali ayollardan har yili oʻrtacha 550-600 nafar chaqaloq tugʻiladi va ularga OIV infeksiyasini onadan bolaga oʻtishini oldini olish maqsadida, retrovirusga qarshi dorilar oʻz vaqtida berib boriladi. OIV infeksiyasining onadan bolaga oʻtishini oldini olish maqsadida tugʻilgan chaqaloqlar (6 oylikkacha) sunʼiy oziqlantirish (quruq sut) bilan taʼminlanadi.

• Matbuot anjumani
• salomatlik