1967-yildan buyon Isroil nazorati ostidagi falastinliklar uchun 2025-yil eng qonli yil bo‘ldi. Bu haqda isroillik 12 ta huquq himoyasi tashkiloti tayyorlagan hisobotda ma’lum qilingan.

Bildirilishicha, G‘azoda bir yil ichida 67 ming nafardan ortiq falastinlik halok bo‘lgan. Ularning orasida 20 ming bola va 10 ming ayol bor.

2025-yil davomida G‘azoning 1,9 million aholisi majburan ko‘chirildi. Bu sektor aholisining taxminan 90 foizini tashkil qiladi.

Ma’lumotlarga ko‘ra, 1967-yildan beri Falastinning G‘arbiy sohilida falastinliklar yerlarini egallab kelayotgan isroillik guruhlarning zo‘ravonligi 2025-yilda keskin kuchaygan va bu amalda “ommaviy quvib chiqarish”ga aylangan.

Shuningdek, Isroilning gumanitar yordam kirishini to‘sib qo‘yishi tufayli ocharchilik ommaviy halokatga aylandi. Birgina iyul oyining o‘zida 13 ming bolaga “og‘ir ozuqa yetishmasligi” tashxisi qo‘yilgan, yil davomida esa ochlikdan 461 kishi vafot etgan.

Isroil va AQSh nazoratidagi yordam tarqatish punkti oldida 2 306 falastinlik otib o‘ldirilgan, yana 16 929 kishi yaralangan.

• Ayollar
• Bolalar
• Falastin
• G‘azo
• Isroil
• O'lim