London Qirollik botanika bogʻi olimlar tomonidan kashf etilgan yangi daraxt turiga taniqli aktyor Leonardo di Kaprio sharafiga nom berilganini maʼlum qildi. Olimlarning taʼkidlashlaricha, ushbu tanlovga aktyorning kashf etilgan turga tegishli yagona daraxt namunasi saqlanayotgan qoʻriqxonadagi oʻrmonlarni kesishga qarshi chiqqani va bu borada faollik koʻrsatgani sabab boʻlgan.

Kamerundagi Ebo oʻrmonidan topilgan daraxtga londonlik olimlar tomonidan nom berilgan. Endilikda daraxtning ilmiy nomi – “Uvariopsis dicaprio“dir.

Aktyor Kamerun hukumati inson qoʻli tegmagan holatda saqlanayotgan oʻrmonni kesishga rasman ruxsat berganidan keyin ijtimoiy tarmoqlarda bunga qarshi kampaniya boshlagan edi. Oradan necha oy vaqt oʻtib, Kamerun hukumati oʻz qarorini bekor qilgan, mutaxassislar qarorning bekor qilinishida Di Kaprio tomonidan boshlangan kampaniyaning ahamiyati juda katta boʻlganini qayd etishgan.

“Uvariopsis dicaprio” yoʻqolib ketish xavfi ostida boʻlgan turlar roʻyxatiga kiritilgan. Olimlarning aytishlaricha, uning balandligi 4 metrga teng keladigan yagona namunasi piyodalar yoʻlakchasi yonidan topilgan.

• Kino
• mashhurlar
• qiziqarli
• tabiat