Hamkorbank 25-fevraldan boshlab Rossiyaning Sberbankiga tegishli mobil ilova – "Сбербанк Онлайн" ilovasi orqali o‘zining plastik kartalariga yuborilayotgan mablag‘larni kartalarga kirim qilishni vaqtinchalik to‘xtatdi. Bu haqda Hamkorbank’ning rasmiy saytida ma’lum qilindi.

Bank ma’muriyatining bildirishicha, bank tizimida olib borilayotgan texnik ishlar hamda mijozlarning moliyaviy yo‘qotishlariga yo‘l qo‘ymaslik maqsadida shu qarorga kelingan.

Ayni paytda yuborilayotgan mablag‘larni kirim qilish qachon tiklanishi noma’lum.

Ma’lumot uchun, 24-fevral kuni AQSh hukumati tomonidan e’lon qilingan sanksiyalarning navbatdagi paketida Rossiyaning eng yirik banki – Sberbankka nisbatan ham bir qator sanksiyalar qo‘yilgan.

Hamkorbank o‘zbek banklari ichida Buyuk Britaniya, AQSh va Kanada tomonidan sanksiyalar qo‘llangan bank – Sberbank kartalaridan yuborilayotgan pul mablag‘larini kirim qilishni to‘xtatganini ma’lum qilgan birinchi o‘zbek banki bo‘ldi.

Sberbank bilan vakillik hisobvaraqalarga ega O‘zbekistondagi boshqa banklar – Milliy bank, Agrobank va Ipak yo‘li bank hali bu boradagi qarorlarini ma’lum qilmagan.

• Hamkorbank
• Rossiya
• Sanksiya
• Sberbank
• Urush