Ma’lum bo‘lishicha, 2024-yil IV choragi yakunida davlat qarzi 40,2 milliard dollarga yetgan. Bu mamlakat yalpi ichki mahsulotining 35 foiziga tengdir.

Davlat kafolati ostida olingan kreditlarning 33,7 mlrd dollari yoki 84 foizi tashqi qarz bo‘lib, shundan 17,9 mlrd dollari qat’iy belgilangan foiz stavkada jalb qilingan. Qolgan 15,64 mlrd dollari o‘zgaruvchan foiz stavkalarda olingan. Biroq qarz tarkibi ko‘rsatilmagan, kreditlar necha foizdan jalb qilingani ma’lum emas.

Ichki qarz miqdori 6,5 milliard dollarga yaqinlashgan (yil boshida 5,9 milliard dollar bo‘lgan). Shundan 5,1 milliard dollar qat’iy belgilangan foiz stavkada olingan. Yana 1,2 mlrd dollari foizsiz jalb qilingan.

Oxirgi besh yilda davlat qarzi miqdorlari quyidagicha o‘zgargan:

– 2019 yilda — 17,8 mlrd dollar;

– 2020 yilda — 23,4 mlrd dollar;

– 2021 yilda — 26,3 mlrd dollar;

– 2022 yilda — 29,2 mlrd dollar;

– 2023 yilda — 34,9 mlrd dollar.

Iqtisodiyot va moliya vazirligi ekspertlari so‘zlariga ko‘ra, oxirgi paytlarda yapon iyenasining sezilarli qadrsizlanishi O‘zbekiston tashqi qarzini 250 million dollarga kamaytirgan.

2024-yilda davlat tashqi qarzi jalb qilishning yillik limiti 5 milliard dollar etib belgilanib, yakunida bu miqdor 7,3 milliard dollarga yetgan edi. 2025-yilda ushbu limit 5,5 milliard dollar etib belgilangan.

• Kredit
• O‘zbekiston
• Tashqi qarz