Kecha, 6-dekabr kuni soat 09:40 da Buxoro viloyati Kogon tumani “Mustaqillik” MFY hududida joylashgan “Shams LTD” MChJga qarashli tog‘-kon sanoati korxonalari uchun portlovchi moddalarni ishlab chiqarish sexida chaqnash (portlash) ro‘y berib, oqibatda yong‘in kelib chiqqan.

Yong‘in Buxoro viloyati favqulodda vaziyatlar boshqarmasining 7 ta qutqaruv bo‘linmalari tomonidan soat 10:27 da to‘liq o‘chirilgan. Bu haqda Buxoro viloyati FVB axborot xizmati xabar berdi.

“Shams LTD” MChJ 2019-yildan buyon faoliyat yuritib kelayotgan Markaziy Osiyo va O‘zbekiston tog‘-kon sanoati korxonalari ehtiyojlari uchun yangi konlarni o‘zlashtirishda qo‘llaniladigan portlovchi moddalarni yetkazib berishga ixtisoslashgan korxona hisoblanadi.

Korxonaga qarashli ishlab chiqarish sexida ro‘y bergan chaqnash vaqtida omborda 30 nafar ishchi bo‘lgan, ulardan 4 nafari vafot etgan.

Yengil darajada tan jarohati olgan 4 nafar xodim shifoxonaga joylashtirilgan, ularning 2 nafariga ambulator tibbiy yordam ko‘rsatilib, uyiga ruxsat berilgan.

Baxtsiz hodisa munosabati bilan O‘zbekiston Respublikasi Prezidenti Shavkat Mirziyoyevning topshirig‘iga muvofiq Sanoat xavfsizligi qo‘mitasi raisi A.Rafiqov boshchiligida mas’ul vazirlik va idoralar vakillaridan iborat Hukumat komissiyasini tashkil etish bo‘yicha Vazirlar Mahkamasining farmoyishi qabul qilindi.

“Hukumat komissiyasiga jabrlanganlarga zarur yordam ko‘rsatish, portlash oqibatlarini bartaraf qilish, ushbu baxtsiz hodisaning kelib chiqish sabablarini aniqlash hamda kelgusida bu kabi noxush holatlarning oldini olish choralarini ko‘rish vazifasi yuklatildi.

Hozirda yong‘in sodir bo‘lgan hudud to‘liq nazoratga olinib, uning oqibatlarini bartaraf etish ishlari amalga oshirilmoqda”, – deyiladi xabarda.

• Buxoro
• FVB
• Maxsus komissiya
• portlash