O‘zbekiston U-17 terma jamoasi Jahon chempionatining chorak finalida Fransiyaga qarshi maydonga tushadi. Faranglar nimchorak finalda Senegalni penaltilar hisobida mag‘lub etdi.

Chorak final o‘yinimiz 25-noyabr, shanba kuni Toshkent vaqti bilan soat 13:30 da boshlanadi.

Lekin Fransiya termasida muammo yuzaga kelmoqda. Indoneziyada davom etayotgan o‘smirlar o‘rtasidagi Jahon chempionati chorak finalida O‘zbekiston bilan to‘qnashadigan Fransiya musobaqadan chetlatilishi mumkin.

Ya’ni, termada to‘p suruvchi “Monpele” hujumchisi Yannis Isuufu kichik mundialning saralashida Niger o‘smirlar terma jamoasida o‘ynagan va bundan Fransiya futbol federatsiyasi xabardor bo‘lmagan. 

FIFA qoidalariga ko‘ra, bir turnir doirasida futbolchining ikkita turli terma jamoada to‘p tepishi mumkin emas. Vaziyatdan kelib chiqib Fransiya bilan bir guruhdan o‘rin olgan va pley-off bosqichiga chiqa olmagan Burkina-Faso apellyatsiya bergan.

Issufu Fransiya terma jamoasining guruh bosqichidagi barcha o‘yinida maydonga tushdi. Niger o‘smirlari safida esa u 2022-yilda 2 ta o‘yinda maydonga tushgan. Saralashda u Kot-d'Ivuarga qarshi o‘yinda gol urgan bo‘lsa, Beninga qarshi bahsda eng yaxshi futbolchi deb topilgan.

• Fransiya
• Indoneziya
• Jahon chempionati