Joriy yil 16-may kuni Madaniyat va turizm vazirligi hamda Germaniya turistik assotsiatsiyasi bilan hamkorlikda Germaniya va O‘zbekiston turizm sohasi vakillari ishtirokida “Destination forum” xalqaro konferensiyasi bo‘lib o‘tdi. Tadbirda Madaniyat va turizm vaziri Ozodbek Nazarbekov, Germaniya turistik assotsiatsiyasi prezidenti Norbert Fibig hamda ikki mamlakatning yirik turistik kompaniyalari rahbarlari ishtirok etdi.

Madaniyat va turizm vaziri Ozodbek Nazarbekov o‘z so‘zida “O‘zbekiston va Germaniya o‘rtasida turizm sohasidagi hamkorlik ikki davlatning iqtisodiy aloqalarini rivojlantirishning muhim yo‘nalishlaridan biridir. Shu boisdan O‘zbekiston muntazam ravishda Germaniyada tashkil etiladigan jahondagi eng yirik “ITB-Berlin” turistik yarmarkasida ishtirok etib, Germaniyaning yetakchi OAV vakillari va turoperatorlari uchun mamlakatimizga press-tur va sayohatlar uyushtirmoqda. Shuningdek, Germaniyada “O‘zbekiston turizm va madaniyati kunlari”ni o‘tkazish yaxshi an’anaga aylandi”, deya aytib o‘tdi.

Tadbir davomida Germaniya turistik assotsiatsiyasi a’zolari bilan birgalikda turizm dasturlarini kengaytirish, Germaniyadan keladigan turistlarni qiziqtiradigan yangi turistik marshrutlarni ishlab chiqish va nemis turoperatorlari bilan hamkorlikni faollashtirish, qolaversa, turistik kompaniyalar o‘rtasida shartnomalar tuzish va hamkorlik tarmoqlarini kengaytirish masalalari atroflicha muhokama etildi.

Ma’lumot uchun, Germaniyaning yirik turkompaniyalari yordamida O‘zbekistonning turizm imkoniyatlarini G‘arbiy Yevropa bo‘ylab targ‘ib qilish va ushbu qitʼadan yurtimizga keluvchi turistlar sonini ko‘paytirish maqsadida joriy yilning 11-16-may kunlari Germaniyaning 70 nafar turistik kompaniyalari vakillarining O‘zbekistonga tashrifi tashkil etildi.

• Germaniya
• O‘zbekiston
• Turizm