Joriy yilning 24-fevral kuni O‘zbekiston Respublikasi iqtisodiyot va moliya vazirining o‘rinbosari Ilxomjon Umrzakov Polsha taraqqiyot va texnologiyalar vazirining o‘rinbosari Mixal Yaros boshchiligidagi delegatsiya vakillari bilan uchrashuv o‘tkazdi.

Polsha delegatsiyasi tarkibiga davlat aktivlari vazirining o‘rinbosari, dori vositalari boshqarmasi raisining o‘rinbosari, biznes Ombudsmani, investitsiyalar va savdo agentligi prezidenti, shuningdek Polsha ixtisoslashtirilgan idoralari va ishbilarmon doiralarining yetakchi mutaxassislari kirdi.

Muzokaralar ikki mamlakat o‘rtasidagi iqtisodiy va savdo aloqalarini mustahkamlash va kengaytirishga bag‘ishlandi.

Tomonlar o‘zaro manfaatli iqtisodiy hamkorlikning keng yo‘nalishlarini, jumladan xususiylashtirish, bank sektori, farmatsevtika sanoati, geologiya va boshqa sohalarni muhokama qildilar. Polsha tomoni mazkur yo‘nalishlarda O‘zbekiston bilan tajriba almashishga tayyorligini bildirdi.

Bundan tashqari, O‘zbekiston tomoni Polshaning hududlarni rivojlantirish, shuningdek, energiya samaradorligini oshirish borasidagi tajribasini o‘rganishga qiziqish bildirdi. Uchrashuv yakunida Polsha tomoni O‘zbekiston iqtisodiyotining turli tarmoqlariga investitsiyalarni jalb etish, qo‘shma korxonalar tashkil etish va ilg‘or texnologiyalarni joriy etishdan faol manfaatdor ekanini bildirdi. Bu, o‘z navbatida, yangi ish o‘rinlarini yaratishga va ikki mamlakat iqtisodiyotining raqobatbardoshligini oshirishga yordam beradi.

Ushbu uchrashuv ikki tomonlama munosabatlarni mustahkamlashda muhim qadam bo‘ldi va har ikki mamlakat aholisining barqaror iqtisodiy o‘sishi va turmush darajasini oshirishga yordam beradigan chuqur hamkorlik uchun yangi imkoniyatlar ochdi.

• Hamkorlik
• O‘zbekiston
• Polsha