Markaziy bank tahlillariga ko‘ra, 2025-yil yanvar-iyun oylarida chet eldan O‘zbekistonga kelib tushgan pul o‘tkazmalari 8,2 mlrd dollarni tashkil qildi. Bu 2024-yil mos davridagiga nisbatan 1,8 mlrd dollarga ko‘p (27 foiz).

“Mablag‘larning 78 foizi Rossiyadan (6,4 mlrd dollar) kelib tushgan. Qolgan qismi Qozog‘iston, AQSh, Janubiy Koreya, Turkiya, Buyuk Britaniya, Qirg‘iziston, Litva hamda boshqa mamlakatlar hissasiga to‘g‘ri kelgan”, deyiladi manbada.

Pul o‘tkazmalari ortishiga o‘zbekistonlik migrantlar ishlaydigan davlatlarda ishchi kuchiga talab ko‘paygani va ish haqlari yuqori darajada saqlanib qolgani sabab bo‘lgan. Shu bilan bir qatorda milliy valyuta kurslari mustahkamlanishi ham ta’sir qilgan.

Markaziy bank tahliliga qaraganda, O‘zbekistonga rivojlangan mamlakatlardan kelib tushgan transchegaraviy pul o‘tkazmalari hajmlari o‘sib bormoqda. Masalan, transfertlar hajmi Buyuk Britaniyadan ikki barobar, Yevropa Ittifoqi mamlakatlaridan 41 foizga (Irlandiya 2,8 barobar, Litva 79 foiz, Niderlandiya 44 foiz, Polsha 20 foiz) hamda AQShdan 15 foizga oshgan.

Olti oy davomida jismoniy shaxslarga kelib tushgan pullarning 4,3 mlrd dollari (53 foizi) an’anaviy xalqaro pul o‘tkazma tizimlaridan yuborilgan. Bunda o‘sish hajmi 2024-yil mos davriga nisbatan 22 foizni tashkil etgan. Yana 3,6 mlrd dollar (44 foizi) xorijdan bank kartalariga to‘g‘ridan to‘g‘ri (P2P) o‘tkazmalar orqali (o‘sish 40 foiz) kelib tushgan. O‘z navbatida 251 mln dollar (3 foizi) bank o‘tkazmasi (SWIFT) orqali (kamayish 22 foiz) amalga oshirilgan.

Joriy yil yanvar-iyun oylarida O‘zbekistondan chet elga yuborilgan pul o‘tkazmalari hajmi o‘tgan yil darajasida saqlanib qolib, 1,2 mlrd dollarni tashkil qilgan.

• Markaziy bank
• pul