Buyuk Britaniya hukumati Yevropa davlatlari yetakchilari hamda Ukraina prezidenti Vladimir Zelenskiy tomonidan imzolangan qo‘shma bayonotni e’lon qildi. Unda Ukrainadagi jangovar harakatlarni hozirgi front chizig‘ida to‘xtatishga chaqirilgan.

Mazkur bayonot Buyuk Britaniya, Germaniya, Fransiya, Italiya, Polsha, Norvegiya, Daniya, Finlyandiya davlat va hukumat rahbarlari, shuningdek, Yevropa Ittifoqi Kengashi va Yevrokomissiya raislari tomonidan imzolandi.

“Rossiyaning vaqtni cho‘zish taktikasi Ukraina tinchlikka jiddiy intilayotgan yagona tomon ekanini qayta-qayta ko‘rsatmoqda”, — deyiladi bayonotda.

17-oktyabr kuni Oq uyda AQSh va Ukraina prezidentlarining uchrashuvi bo‘lib o‘tdi. Uchrashuvdan so‘ng Tramp post e’lon qilib, Zelenskiyga Putin kabi qotilliklarni to‘xtatishni va kelishuv tuzishni tavsiya qilganini bildirdi.

“Bizning fikrimizcha, ular shunchaki o‘zlari turgan chegaralarda, front chizig‘ida to‘xtashlari kerak. Ikkala tomon ham g‘alaba qozonsin, Tarix hukm chiqarsin!” — deb yozdi Tramp. Zelenskiy Trampning hozirgi front chizig‘ida jangovar harakatlarni to‘xtatish va muzokaralarni boshlash taklifini qo‘llab-quvvatladi.

Rossiya, o‘z navbatida, Trampning bu g‘oyasini rad etdi. Rossiya tashqi ishlar vaziri Sergey Lavrov 21-oktyabr kuni Rossiya “hech narsaga olib kelmaydigan” zudlik bilan o‘t ochishni to‘xtatish emas, balki uzoq muddatli tinchlikka erishish formulasiga “to‘liq sodiq qolishini” ma’lum qildi. “Shuning uchun hozir Vashingtondan zudlik bilan to‘xtash kerakligi haqida gapira boshlashganida, boshqa hech narsani muhokama qilishning hojati yo‘q, to‘xtash kerak, keyin esa tarix hukm chiqaraversin. Tushunyapsizmi, agar shunchaki to‘xtash kerak bo‘lsa, bu mojaroning asl sabablarini unutish degani”, — dedi Lavrov.

• Rossiya
• Tramp
• Ukraina
• Urush
• Yevropa Ittifoqi
• Zelenskiy