Butun dunyoda 2023-yilning avgustidan joriy yilning may oyigacha 163 nafar jurnalist o‘ldirilgan. Bu haqda Birlashgan Millatlar Tashkiloti Bosh kotibi Antoniu Guterrish ma’lum qildi.

Uning so‘zlariga ko‘ra, YUNESKO 2023-yil avgustidan 2025-yil may oyigacha 163 nafar jurnalistning o‘ldirilganini qayd etgan. Ulardan 109 nafari, jumladan, 12 nafar ayol jangovar hududlarda halok bo‘lgan. Eng ko‘p qurbonlar G‘azo sektorida (46 kishi), Sudanda (13 kishi) va Ukrainada (8 kishi) qayd etilgan. 

Jurnalistlar qotilligi urush kechmayotgan mamlakatlarda ham davom etmoqda. Masalan, YUNESKO ma’lumotiga ko‘ra, Meksikada vaziyat ko‘plab urush zonalaridagidan xavfliroq. Ko‘rsatilgan davrda u yerda 15 nafar OAV xodimi o‘ldirilgan.

Eng ko‘p tasdiqlangan qotillik holatlari arab davlatlarida (82 ta) qayd etilgan, undan keyin Lotin Amerikasi va Karib havzasi mamlakatlari (34 ta), Afrika (5 ta), Osiyo-Tinch okeani mintaqasi (30 ta) hamda Yevropa va Shimoliy Amerika (12 ta) keladi. 

• Falastin
• Genotsid
• Isroil
• jurnalist