Parij Olimpiadasida dzyudo bahslariga start berildi. Bugun, 27-iyul sanasida o‘zbekistonlik Doston Ro‘ziyev hamda Halima Qurbonova Olimpiya o‘yinlarida debyut qildi.

-60 kg.gacha vazn toifasidagi sportchilar o‘rtasida Doston Ro‘ziyev ukrainalik Dilshod Xolmatovga qarshi gilamga ko‘tarildi. Afsuski, Doston kichik hisobda raqibiga mag‘lub bo‘lib (0:1), Parij-2024 yozgi Olimpiya o‘yinlaridagi ishtirokini yakunladi.

-48 kg.gacha vazn toifasidagi sportchilar o‘rtasida Halimajon Qurbonova Ozarbayjon vakili Leyla Aliyevaga qarshi harakat qildi. Xorazmlik sportchi qiyin kechgan uchrashuvda 1:0 hisobida g‘alaba qozondi. Endi u shvetsiyalik Tara Babulfathga qarshi tatamiga ko‘tariladi.

Shuningdek, Parij Olimpiadasida akademik eshkak eshish bahslariga ham start berildi. Unda o‘zbekistonlik Anna Prakaten o‘z ishtirokini boshladi.

Yangi Zelandiya, Paragvay, Meksika va Kuba sportchilariga qarshi harakat qilgan sportchi ikkinchi o‘rin bilan saralash bahslarini yakunladi.

Dastlabki saralash bosqichining 3-guruhida startga chiqqan o‘zbekistonlik sportchi 7:37.80 natija bilan 2-bo‘lib marra chizig‘ini kesib o‘tdi. Ushbu ko‘rsatkich evaziga Anna to‘g‘ridan-to‘g‘ri chorak final ishtirokchisiga aylandi.

• Dzyudo
• Olimpiada